André Schwartz en Coenie de Villiers, twee van Suid-Afrika se mees bekende en geliefde musikante, slaan vir die eerste keer hande saam vir die unieke produksie genaamd Grensloos. “Ons het al jare lank gedreig om saam iets te skep, en nou het daardie tyd uiteindelik aangebreek!” het Coenie verklaar.

By elke vertoning bring die twee talentvolle pianiste hulle vleuelklaviere saam, waarop hulle beide speel. Coenie het verduidelik dat hoewel almal bewus is van André se internasionale status as sanger, nie almal besef dat hy ook ‘n uitmuntende pianis is nie. Hy het ook gesê dat die vertoning ‘n intiemere kant het en ‘n dieper insig bied.

André en Coenie toer deur die hele land, waar hulle optredes by damesoggende, groot feeste en selfs privaatfunksies aanbied.

Maar waarom die titel Grensloos? “Ons wou graag iets skep wat grense oorskry,” sê André. “Daar is ongelooflike sowel as minder bekende komposisies uit onder meer Frankryk en Nederland, asook uit Suid-Afrika. Ons voer ‘n paar van Coenie en my eie komposisies uit, waarvan baie heeltemal nuut sal wees vir gehore. Ons wou ‘n vertoning saamstel sonder ‘n enkele kompromis – ‘n mens weet nooit wanneer jy weer die geleentheid sal kry nie!”

Tydens die vertoning deel Schwartz en De Villiers ook persoonlike herinneringe aan hulle eerste opnames.

“Dit voel soos om na jou ou matriekafskeid foto’s te kyk,” lag die twee musikante. “Hopelik het ons albei deur die jare gegroei; nou kan ‘n mens ‘n vertoning saamstel waar jy die dinge kan doen wat jy nog altyd wou. En dit is fantasties om saam te werk – dit moes al lankal gebeur het!”

Schwartz en De Villiers word vir ‘n oomblik ernstig. “En dit is ook ‘n positiewe vertoning – niemand bepaal sy of haar lot deur grense nie. Dit is wonderlik om te sien hoe die verskeidenheid liedjies hierdie boodskap van lewe en laat lewe oor alle grense weerspieël – nie net tussen lande nie, maar ook tussen mense, geslagte en kulture. Aan die einde van die dag is ons almal net mens … “

Kom ervaar die viering van lewe in woord en lied, uitgevoer deur twee van ons land se mees talentvolle musikante. Daar is iets betowerends wanneer hierdie twee kunstenaars die verhoog betree – ‘n ervaring wat onmisbaar en onvergeetlik is.