Franja du Plessis is ’n veelbekroonde sanger, liedjieskrywer en vervaardiger wat sedert haar debuutalbum My Verhaal in 2016 diep spore trap in die Afrikaanse musiekbedryf. Sy het al op groot verhoogproduksies soos Afrikaans is Groot en Gospel Skouspel verskyn, en haar oorspronklike musiek het haar gevestig as een van die mees unieke stemme in die land.
Met albums soos Hittegolf (2018) en Los Jou Hart (2022), sowel as treffers soos Bring Dit, Gee My ’n Boerseun, en Lisensie, het sy bewys dat haar werk beide radiovriendelik én persoonlik is. Sy is ook mede-skrywer van verskeie van haar ma, Juanita du Plessis, se groot treffers.
In 2024 het sy nuwe kreatiewe hoogtes bereik met haar EP Die Ou Ford, asook enkelsnitte soos Vat Jou Goed, Kry My In die Middel en VERE – almal beskikbaar op digitale platforms.
Franja is nie net ’n kunstenaar nie, maar ook ’n talentvolle vervaardiger wat aktief werk aan nuwe projekte vir haarself én ander kunstenaars.
